ದಾಂಡೇಲಿ :
ನಿರ್ಮಲನಗರದಲ್ಲಿ ಮರದಿಂದ ಆಯತಪ್ಪಿ ಬಿದ್ದು, ಇನ್ನೇನೂ ನಾಯಿಗೆ ಆಹಾರವಾಗಬೇಕೆನ್ನುವಷ್ಟರೊಳಗೆ ಸ್ಥಳೀಯರ ಸಹಕಾರದಲ್ಲಿ ಹಾರ್ನ್ ಬಿಲ್ ಪಕ್ಷಿಯನ್ನು ದಾಂಡೇಲಿ ನಗರ ಠಾಣೆಯ ಹವಾಲ್ದಾರ್ ಮಹದೇವ ಬಳೆಗಾರ ಅವರು ರಕ್ಷಿಸುವ ಮೂಲಕ ವನ್ಯ ಕಾಳಜಿಯನ್ನು ಮೆರೆದಿದ್ದಾರೆ.
ನಿರ್ಮಲ ನಗರದಲ್ಲಿ ಮರದಿಂದ ಆಯತಪ್ಪಿ ಬಿದ್ದ ಹಾರ್ನ್ ಬಿಲ್ ಹಕ್ಕಿಯನ್ನು ಅಲ್ಲೇ ಇದ್ದ ಬೀದಿ ನಾಯಿಗಳು ಇನ್ನೇನೂ ತಿನ್ನಬೇಕೆಂದು ಹೊಂಚು ಹಾಕಿದ್ದವು. ಇದನ್ನು ಗಮನಿಸಿದ ಅಲ್ಲೇ ಇದ್ದ ನಗರ ಠಾಣೆಯ ಹವಾಲ್ದಾರ್ ಮಹಾದೇವ ಬಳೆಗಾರ ಅವರು ಸ್ಥಳೀಯರಾದ ಅನಿಲ್, ಶಿವಪ್ಪ ಬಳ್ಳಾರಿ, ಸುಮಿತ್ ಶೇರಖಾನೆ, ವಿನಯ ಕುಂದರಗಿ, ಆಶೀರ್ವಾದ ಶಂಕರ್ ಖಾರ್ವಿ ಅವರ ಸಹಕಾರದಲ್ಲಿ ಬಿದ್ದು ನರಳುತ್ತಿದ್ದ ಹಾರ್ನ್ ಬಿಲ್ ಹಕ್ಕಿಯನ್ನು ರಕ್ಷಿಸಿ ಆರೈಕೆ ಮಾಡಿ,ತಕ್ಷಣವೇ ಅರಣ್ಯ ಇಲಾಖೆಗೆ ಮಾಹಿತಿಯನ್ನು ನೀಡಿ, ಅರಣ್ಯ ಇಲಾಖೆಯ ಅಧಿಕಾರಿಗಳು ಮತ್ತು ಸಿಬ್ಬಂದಿಗಳಿಗೆ ಒಪ್ಪಿಸಿ ವನ್ಯ ಕಾಳಜಿಯನ್ನು ಮೆರೆದಿದ್ದಾರೆ.
