ಕಾರವಾರ:
ತಾಲೂಕಿನ ಕಣಸಗಿರಿ ಗ್ರಾಮದ ಸರಕಾರಿ ಗೋಶಾಲೆ ನಿರ್ಮಾಣ ಕಾಮಗಾರಿಯಲ್ಲಿ ಲಕ್ಷಾಂತರ ರೂಪಾಯಿಗಳ ಅವ್ಯವಹಾರ ಹಾಗೂ ಕಳಪೆ ಗುಣಮಟ್ಟದ ಕೆಲಸ ನಡೆದಿದೆ ಎಂದು ಆರೋಪಿಸಿ ಬುಧವಾರ ವಿವಿಧ ಹಿಂದೂಪರ ಸಂಘಟನೆಗಳ ಮುಖಂಡರು ಜಿಲ್ಲಾಡಳಿತಕ್ಕೆ ಮನವಿ ಸಲ್ಲಿಸಿದರು.
ಇಲ್ಲಿನ ಜಿಲ್ಲಾಧಿಕಾರಿ ಕಚೇರಿಯ ಬಳಿಕ ನಡೆದ ಪ್ರತಿಭಟನೆಯಲ್ಲಿ ಹಿಂದೂ ಜನಜಾಗೃತಿ ಸಮಿತಿ, ಸನಾತನ ಗೋಮಾತಾ ಚಾರಿಟೇಬಲ್ ಟ್ರಸ್ಟ್, ಸನಾತನ ಧರ್ಮ ರಕ್ಷಣಾವೇದಿಕೆ, ಸನಾತನ ರಾಷ್ಟ್ರೀಯ ಸೇವಾ ಸಂಘ, ಭಜರಂಗದಳ ಹಾಗೂ ಭಗತ್ ಸಿಂಗ್ ಸೇನೆಯ ಪ್ರತಿನಿಧಿಗಳು ಭಾಗಿಯಾಗಿದ್ದರು. ಕಣಸಗಿರಿ ಸರ್ವೇ ನಂ.95 ರಲ್ಲಿ 2023ರಲ್ಲಿ ಆರಂಭಗೊಂಡ ಈ ಗೋಶಾಲೆ ಕಾಮಗಾರಿಯನ್ನು ಜಿಲ್ಲಾ ನಿರ್ಮಿತಿ ಕೇಂದ್ರದ ವತಿಯಿಂದ ಕೈಗೊಳ್ಳಲಾಗಿತ್ತು. ಲಕ್ಷಾಂತರ ರೂ.ಗಳ ಅತಿಯಾದ ಖರೀದಿ, ಕಳಪೆ ಗುಣಮಟ್ಟದ ಕಾಮಗಾರಿ ಮತ್ತು ದಾಖಲೆಗಳಲ್ಲಿನ ವ್ಯತ್ಯಾಸವಾಗಿದೆ. ಜಿಲ್ಲಾ ನಿರ್ಮಿತಿ ಕೇಂದ್ರದ ಯೋಜನಾ ವ್ಯವಸ್ಥಾಪಕ ಹರ್ಷ ಶೆಟ್ಟಿಗಾರ ಹಾಗೂ ಅಭಿಯಂತರ ಕಾಮರಾಜ ಈ ಕಾಮಗಾರಿಗೆ ನೇರ ಹೊಣೆಗಾರರು ಎಂದು ಸಂಘಟನೆಗಳು ಆರೋಪಿಸಿದರು.
ಗೋಡೆ ನಿರ್ಮಾಣ, ಕಬ್ಬಣ ಖರೀದಿ, ಟೈಲ್ಸ್, ಸಿಮೆಂಟ್ ಬಳಕೆ, ಜಿಐ ಶೀಟ್ ಖರೀದಿ ಹಾಗೂ ಕಾರ್ಮಿಕರ ಸಂಖ್ಯೆಯಲ್ಲಿ ತಪ್ಪುಗಳಿವೆ. ಈಗಾಗಲೇ ಗೋಶಾಲೆಯ ಗೋಡೆಗಳಲ್ಲಿ ಬಿರುಕುಗಳು ಕಾಣಿಸಿಕೊಂಡಿದೆ. ಸಾರ್ವಜನಿಕ ಹಣದ ದುರುಪಯೋಗವನ್ನು ಸರಕಾರ ತಕ್ಷಣ ತಡೆದು ಅಪೂರ್ಣಗೊಂಡ ಗೋಶಾಲೆ ಕಾಮಗಾರಿಯನ್ನು ಗುಣಮಟ್ಟದೊಂದಿಗೆ ಪೂರ್ಣಗೊಳಿಸಿ ಪಶುಪಾಲನಾ ಇಲಾಖೆಗೆ ಹಸ್ತಾಂತರಿಸಬೇಕು ಎಂದು ಒತ್ತಾಯಿಸಿದರು.
ಹಿಂದೂ ಜನಜಾಗೃತಿ ಸಮಿತಿ ರಾಜ್ಯ ಸಮನ್ವಯಕ ಗುರುಪ್ರಸಾದ ಗೌಡ, ಸನಾತನ ಧರ್ಮ ರಕ್ಷಣಾವೇದಿಕೆ ರಾಜ್ಯಾಧ್ಯಕ್ಷ ಡಾ. ಗಜೇಂದ್ರ ನಾಯ್ಕ, ಸನಾತನ ಗೋಮಾತಾ ಚಾರಿಟೇಬಲ್ ಟ್ರಸ್ಟ್ ಅಧ್ಯಕ್ಷ ಸಂದೀಪ ಆರ್ ಗೋಕರ್ಣಕರ, ಸನಾತನ ರಾಷ್ಟ್ರೀಯ ಸೇವಾ ಸಂಘ ಅಧ್ಯಕ್ಷ ಶರತ, ಭಜರಂಗದಳ ಪ್ರಮುಖ ಅಮಿತ ಮಾಳ್ಸೇಕರ ಹಾಗೂ ಭಗತ್ ಸಿಂಗ್ ಸೇನೆ ಅಧ್ಯಕ್ಷ ಸೂರ್ಯಕಾಂತ ಕಳಸ ಇದ್ದರು.
