ಕಾರವಾರ:
ತಾಲೂಕಿನ ಗಾಂವಗೇರಿ ಕ್ರಾಸ್‌ ಬಳಿ ನಡೆದ ಅಬಕಾರಿ ಇಲಾಖೆಯ ತಪಾಸಣೆಯಲ್ಲಿ, ಗೋವಾದಿಂದ ಅಕ್ರಮವಾಗಿ ತರಲಾಗುತ್ತಿದ್ದ ದೊಡ್ಡ ಪ್ರಮಾಣದ ಮದ್ಯ ಜಪ್ತಿ ಆಗಿದೆ.
ಒಟ್ಟು 6.14 ಲಕ್ಷ ರೂ. ಮೌಲ್ಯದ 133.560 ಲೀಟರ್ ಮದ್ಯ ಮತ್ತು ಅದನ್ನು ಸಾಗಿಸಲು ಬಳಸಿದ್ದ ಟಾಟಾ ಇಂಡಿಕಾ ಕಾರುವನ್ನು ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ.
ಮಂಗಳೂರು ವಿಭಾಗದ ಜಾರಿ ಹಾಗೂ ತನಿಖಾ ಜಂಟಿ ಆಯುಕ್ತರು ಮತ್ತು ಉತ್ತರ ಕನ್ನಡ ಜಿಲ್ಲೆಯ ಅಬಕಾರಿ ಉಪ ಆಯುಕ್ತರ ನಿರ್ದೇಶನದಡಿ ಕಾರವಾರ ಉಪ ವಿಭಾಗದ ತಂಡ ಬುಧವಾರ ರಾತ್ರಿ-ಬೆಳಗಿನ ಜಾವ ವಿಶೇಷ ಗಸ್ತು ನಡೆಸುತ್ತಿದ್ದ ವೇಳೆ ಈ ಪ್ರಕರಣ ಬಯಲಿಗೆ ಬಂದಿದೆ.
ಖಚಿತ ಮಾಹಿತಿ ಆಧರಿಸಿ ತಡೆದ ವಾಹನದಲ್ಲಿ ಗೋವಾ ಮದ್ಯವನ್ನು ಅಕ್ರಮವಾಗಿ ಸಾಗಿಸಲಾಗುತ್ತಿದೆ ಎಂಬುದು ದೃಢಪಟ್ಟಿದೆ.
ತಪಾಸಣೆಯ ವೇಳೆ ಕಾರು ಚಾಲಕ ಕತ್ತಲಿನ ಸದುಪಯೋಗ ಮಾಡಿಕೊಂಡು ಸ್ಥಳದಿಂದ ಪರಾರಿಯಾಗಿದ್ದು, ಆತನಿಗಾಗಿ ಶೋಧ ಕಾರ್ಯ ಮುಂದುವರೆದಿದೆ. ಘಟನೆಯ ವಿವರಕ್ಕೆ ಸಂಬಂಧಿಸಿದಂತೆ ಅಬಕಾರಿ ಇಲಾಖೆ ಕಾರವಾರ ಉಪ ವಿಭಾಗದಲ್ಲಿ ಪ್ರಕರಣ ದಾಖಲಿಸಲಾಗಿದೆ.
