ಶಿರಸಿ :
ತೋಟಗಳಿಗೆ ಕಾಡು ಪ್ರಾಣಿಗಳು ನುಗ್ಗದಂತೆ ಬೇಲಿಗೆ ಹಾಕಲಾಗಿದ್ದ ಬಲೆಯಲ್ಲಿ ಸಿಲುಕಿಕೊಂಡಿದ್ದ ಸುಮಾರು 14ಅಡಿ ಉದ್ದದ ದೈತ್ಯ ಕಾಳಿಂಗ ಸರ್ಪವೊಂದನ್ನ ಕುಮಟಾದ ಸಾಹಸಿ ಉರಗ ತಜ್ಞ ಪವನ ನಾಯ್ಕ ರಕ್ಷಣೆ ಮಾಡಿದ್ದಾರೆ.
ಕಳೆದ ಎರಡು ದಿನಗಳಿಂದ ಶಿರಸಿ ತಾಲೂಕಿನ ರಾಗಿಹೊಸಳ್ಳಿಯ ಪ್ರಶಾಂತ್ ಹೆಗಡೆಯವರ ಮನೆಯ ತೋಟದಲ್ಲಿ ಕಾಣಿಸಿಕೊಂಡ ಕಾಳಿಂಗ ಸರ್ಪ ತೋಟಕ್ಕೆ ಕಾಡುಹಂದಿಯ ರಕ್ಷಣೆಗೆಂದು ಹಾಕಿದ ಬೆಲೆಯು ಸುತ್ತುವರಿದಿದ್ದರಿಂದ ತಪ್ಪಿಸಕೊಂಡು ಹೋಗಲಾಗದೆ ಬಲೆಯಲ್ಲಿ ಸಿಲುಕಿಕೊಂಡಿತ್ತು.ಎರಡು ದಿನ ಕಳೆದು ಅಲ್ಲೆ ಇರುವುದನ್ನ ಕಂಡ ತೋಟದ ಮಾಲೀಕರು ಉರಗ ತಜ್ಞ ಪವನ್‌ಕುಮಾರ ಅವರನ್ನ ಸಂಪರ್ಕಿಸಿದ್ದಾರೆ.
ಉತ್ತರ ಕನ್ನಡ ಜಿಲ್ಲೆಯಲ್ಲಿಯೇ ಚಾಣಾಕ್ಯ ಉರಗ ತಜ್ಞ ಎಂಬ ಖ್ಯಾತೀಯನ್ನ ಪಡೆದಿರುವ ಪವನ್ ಕುಮಾರ ತಕ್ಷಣ ರಾಗಿಹೊಸಳ್ಳಿಗೆ ತೆರಳಿ ಬಲೆಯಲ್ಲಿ ಸಿಲುಕಿಕೊಂಡು ಒದ್ದಾಡುತ್ತಿದ್ದ ಭಾರೀ ಗಾತ್ರದ ಕಾಳಿಂಗ ಸರ್ಪವೊಂದನ್ನ ರಕ್ಷಣೆ ಮಾಡಿ ಕಾಡಿಗೆ ಬಿಟ್ಟಿದ್ದಾರೆ. ಈ ಕಾಳಿಂಗ ಸರ್ಪವನ್ನ ನೋಡಿದ ಸ್ಥಳೀರು ಬೆಚ್ಚಿಬಿದಿದ್ದಾರೆ. ಇನ್ನೂ‌ಕೆಲವರು ಭಯಭೀತರಾಗಿ ಸ್ಥಳದಿಂದ ಓಡಿಹೋಗಿದ್ದಾರೆ.
ಕಾಳಿಂಗ ಸರ್ಪ ಸಾಧು ಹಾಗೂ ನಾಚಿಕೆ ಸ್ವಭಾವದ ಜೀವಿಯಾಗಿದ್ದು. ತನಗೆ ಅತಿಯಾದ ತೊಂದರೆ ನೀಡಿದಲ್ಲಿ ಮಾತ್ರ ಕಚ್ಚುವ ಸಾಧ್ಯತೆ ಇದ್ದು, ಕಳೆದ 4-5 ವರ್ಷಗಳಲ್ಲಿ ರಾಜ್ಯದಲ್ಲಿ ಯಾರಿಗೂ ಕಚ್ಚಿದ ಉದಾಹರಣೆಗಳಿಲ್ಲ ಎಂದು ಪವನ್ ಕುಮಾರ ತಿಳಿಸಿದ್ದಾರೆ.
