ಕಾರವಾರ:
ತುಳಸಿ ಪೂಜೆ ಹಬ್ಬದ ಹಿನ್ನಲೆಯಲ್ಲಿ ನಗರದಲ್ಲಿ ಕಬ್ಬಿನ ವ್ಯಾಪಾರ ಜೋರಾಗಿದ್ದು, ಮುಖ್ಯ ವೃತ್ತಗಳಲ್ಲಿ ಕಬ್ಬುಗಳ ರಾಶಿ ಹಾಕಲಟಗಿತ್ತು. ನಗರದಲ್ಲಿ ನೂರಾರು ವ್ಯಾಪಾರಿಗಳು ಬೀಡು ಬಿಟ್ಟಿದ್ದು ರಸ್ತೆಗಳ ಬದಿಗಳಲ್ಲಿ ಕಬ್ಬನ್ನು ಹರಡಿಕೊಂಡು ವ್ಯಾಪಾರ ಮಾಡುತ್ತಿರುವ ದೃಶ್ಯಗಳು ಕಂಡುಬಂದವು.
ಇಲ್ಲಿನ ಕೋರ್ಟ್ ರಸ್ತೆ, ಎಂಜಿ ರಸ್ತೆ, ಪಿಕಳೆ ರಸ್ತೆ, ಕಾಜುಬಾಗ ರಸ್ತೆ, ಹಬ್ಬುವಾಡ, ರಾಷ್ಟ್ರೀಯ ಹೆದ್ದಾರಿ 66 ರ ಬಳಿಯೂ ಕಬ್ಬಿನ ವಹಿವಾಟು ನಡೆಯಿತು. ಹೆಚ್ಚಾಗಿ ಶಿವಮೊಗ್ಗ, ಸಾಗರ, ಹಾಸನ ಹಾಗೂ ದಾವಣಗೆರೆಯಿಂದ ಲಾರಿಗಳಲ್ಲಿ ಕಬ್ಬು ತಂದು ಮಾರಾಟ ಮಾಡಲಾಯಿತು. ಬೆಳಂಬೆಳಿಗ್ಗೆ ಎಲ್ಲೆಡೆ ಲಾರಿಗಳು ಹಾಗೂ ಪಿಕಪ್ ವಾಹನಗಳಿಂದ ಕಬ್ಬನ್ನು ಇಳಿಸಿ ರಸ್ತೆಯಲ್ಲಿ ಮಾರಾಟಕ್ಕೆ ಇಡುತ್ತಿದ್ದ ದೃಶಗಳು ಸಾಮಾನ್ಯವಾಗಿದ್ದವು. ನ.2 ರಂದು ತುಳಸಿ ವಿವಾಹ ಇರುವ ಕಾರಣ ಮುಂಜಾನೆಯಿಂದಲೇ ಗ್ರಾಹಕರು ಮಾರುಕಟ್ಟೆಗೆ ಲಗ್ಗೆ ಇಟ್ಟಿದ್ದರು. ಕಬ್ಬಿನ ಬಣ್ಣ, ಅಂಕು-ಡೊಂಕು, ಗರಿಗಳು ಎಲ್ಲವನ್ನೂ ಪರೀಕ್ಷಿಸಿ ಖರೀದಿ ಮಾಡುತ್ತಿದ್ದರು. ಬೈಕ್ ಸ್ಕೂಟಿ, ಕಾರು ಹಾಗೂ ಬಾಡಿಗೆ ಆಟೋಗಳಲ್ಲಿ ಕಬ್ಬಿನ ಹೊರೆಗಳನ್ನು ಕಟ್ಟಿಕೊಂಡು ಸಾಗಿಸುತ್ತಿದ್ದರು. ಒಂದು ಕಟ್ಟಿಗೆ 300 ರಿಂದ 400 ರೂ. ವರೆಗೆ ಮಾರಾಟವಾಯಿತು.
