ಕಾರವಾರ:
ಇಲ್ಲಿನ ರಾಷ್ಟ್ರೀಯ ಹೆದ್ದಾರಿ 66 ರಲ್ಲಿ ರಸ್ತೆ ಅಪಘಾತಗಳು ಹೆಚ್ಚುತ್ತಿರುವ ಬೆನ್ನಲ್ಲೆ ಬಿಡಾಡಿ ಜಾನುವಾರುಗಳ ಸಂಖ್ಯೆ ಹೆಚ್ಚಾಗಿದ್ದು ವಾಹನ ಸವಾರರಿಗೆ ತೊಂದರೆಯಾಗುತ್ತಿದೆ.
ನಗರದ ಹೃದಹಭಾಗವಾಗಿರುವ ಬಿಲ್ಟ್ ವೃತ್ತದಲ್ಲಿ 15 ಕ್ಕೂ ಹೆಚ್ಚು ಸಂಖ್ಯೆ ಬಿಡಾಡಿ ಜಾನುವಾರುಗಳ ಗುಂಪು ನಿಂತು ವಾಹನ ಸವಾರರಿಗೆ ತೊಂದರೆ ಮಾಡುವ ದೃಶ್ಯಗಳು ಪ್ರತಿನಿತ್ಯ ಕಂಡುಬರುತ್ತದೆ. ನಗರಕ್ಕೆ ಪ್ರವೇಶ ಪಡೆಯುವ ಮುಖ್ಯ ರಸ್ತೆಯಾದ ಕಾರಣ ಸಾಮಾನ್ಯವಾಗಿಯೇ ವಾಹನಗಳ ಓಡಾಟ ಹೆಚ್ಚಾಗಿರುತ್ತದೆ. ಆದರೆ ಬಿಡಾಡಿ ದನಗಳಿಂದ ವಾಹನಗಳಿ ಸರಾಗವಾಗಿ ಸಾಗದೇ ಅಪಘಾತಗಳಾಗುವ ಸಾಧ್ಯತೆ ಹೆಚ್ಚಿದೆ. ಕೇವಲ ಮುಖ್ಯ ರಸ್ತೆ ಮಾತ್ರವಲ್ಲದೇ ಹಬ್ಬುವಾಡ ರಸ್ತೆ, ನಂದನಗದ್ದಾ, ಕೋಡಿಬಾಗ, ಕಾಜುಬಾಗ ರಸ್ತೆಯಲ್ಲಿಯೂ ಈ ಬಿಡಾಡಿ ಜಾನುವಾರುಗಳು ಹೆಚ್ಚಾಗಿದ್ದು ನಗರಸಭೆಗೂ ತಲೆನೋವಾಗಿ ಪರಿಣಮಿಸಿದೆ.
ಈ ಜಾನುವಾರುಗಳನ್ನು ಗೋಶಾಲೆಗೆ ಸಾಗಿಸಿ ಅಪಘಾತಗಳಾಗಂತೆ ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಡಬೇಕು ಎಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.
